KEE NO. 251 - 300

KEE NO. 251

“ ERBAHAN DOSA ME BENANA “

1) Erbahan dosa me banana

Ije turahna akap mela

Tapi ‘di la kin sempat jera

Sibagi die enggo cilaka

Reff :

Kai kin si rarang ni Dibata

Man kemelanken si e kerina

Ola perturah biak dosa

Ibas geluhta

2) Kalak si labo meteh mela

Labo i’tehna kai si ceda

Temanna ras kade-kadena

Seh banci juru peng’lakona

Reff :

3) Subuk medanak ‘tah metua

Kalak perpangkat ‘tah perjuma

Adina lit kin meteh mela

Langketi dosa me geluhna

Reff ;

4) Kepeken enggo nai-nai nari

Lit me kap cian bas pertibi

Biak si enda la mehuli

Adi ipajuh ras asuhi

Reff :

5) Kune ‘di lit pekulah-kulah

Min olanai pedekah-dekah

Madin meterlah ia robah

Maka geluhna ‘nggo erpapah

Reff :

6) Adina lit meganjang rukur

Ola min e pejangjang rusur

Madin meterlah min ikusur

Ku si mehuli dingen bujur

Reff :

KEE NO. 252

“ BAPA KAMI SI NI SURGA “

1) Bapa kami si ni surge

   G’larNdu pe badia min

   Reh lah min kinirajanNdu

   Seh lah min bagi p’ratenNdu

   I doni enda bagi ni surge

B’reken kami nakan cukup

‘Bas wari sendah enda

AlemiNdu salah kami

Bagi ni alemi kami

Salah kalak si lit man kami

Ola min kami

Ibaba Kam ku bas percuban

Tapi olangilah kami idur si ilat nari

Kam kap simada

Kinirajan bagepe kuasa

Ras kemulian si ndekahna

Amin

KEE NO. 253 “ LIAS ATE “

1) Lias ate Tuhan Yesus Kristus

   Kekelengen ni Dibata Bapa

    Kerembaken Kesah si Badia

   Min ras kita k’rina

   Amin

KEE NO. 254 “ ISURUH DIBATA “

Reff :

Isuruh Dibata si keleng-kelengen

Si sampat-sampaten asa kengasupen

Mbue me kap tuhu si man bahanenta

Radu ras kerina kita ndahi kenca

1) Palas tanam pati em ate mekuah

Ngusih Tuhan Yesus enggo kap nampati

Meriah ukurta ate man pulah

Masap kebiaren ‘je dat ate jadi

Reff :

2) Reff :

Kalak si ngikutken kata Tuhan Yesus

Terangina doni ras k’rina isina

Tegulah temannta ola celus

Si tuduhken dalin ola mampa

3) Reff :

‘Bas nampati teman la ngarapken balas

Pusuh peratenta aruslah meciho

Tuhan ersimulih ibereNa lampas

Sangapen kap mere asang kita ngalo

KEE NO. 255 “ TALENTA “

1) Talenta sini b’reken Dibatanta

Jadi min erlipat ganda

Tutus ateta ndahiken dahinNa

Amin pemberat tapina ermulia

Reff :

Kalak si malang nandangi Tuhan

Lakap ‘nggit nimbak labo ‘nggit nogan

Maka dahinken ‘lah alu tutus

Ola lakoken alu mekarus

2) Geluhta babo doni la kel ndekah

Ola min kita nggit nilah

Gia ‘ncubai setanna si ngerah

Juruslamat erbanca kita pulah

Reff :

3) Ersadalah min arihta kerina

Make kata ras pedahNa

Gelar ni Tuhan ‘lah tetap mulia

Ije me t’ridah ibas lagu-langkahta

Reff :

4) Ulihna lit kap bas Tuhan Dibata

Mulia rikut mehaga

Adi perkisat la kel lit gunana

Jelma mejingkat maka ngena ateNa

Reff :

KEE NO. 256

“ NJALA ENTAH RANI “

1) Njala entah rani nina e

Anding adingen nge kap e

Nina Tuhan Yesus dage:

“Dahikenlah dahinNdu genduari e”

Ninta min kerina ale:

“Ije nda aku o Tuhan

Suruhlah dage

Dage amburkenlah jalanta

Ulanai min lit sierdalih

Ije makana simpar kek’lengenta

Gelah lanai banci salih

2) Di’ mbelang si man peranin

Janah kita mesi ranisa

Kalak sideban pe lanai suin

Perbahan Yesus si madasa

3) Dagena ota si b’ritaken

B’rita si meriah man teman

Gelah lanai lit ibas kegelapen

Dingen lanai lit si tertaban

4) Di ‘nggo kataNa si pakeken

Ras pedahNa pe si dalanken

Ije me t’ridah buah kiniteken

Gelar Dibata imuliaken

KEE NO. 257

“ SIBERITAKEN BERITA SI MERIAH “

Reff :

Siberitaken Berita si Meriah

Ku kalak latih sin dele ‘tah pe lolah

‘Bas si la payo kerina banci robah

Adi Dibata si m’reken sepang luah

1) Enterem denga kalak si kel sehen

Perbahan jumpa rusur kebiaren

Piah lanai bo ‘tehna petumburen

Ndaram-ndarami ingan man tundalen

2) Reff :

Enterem jelma mbue erbagena

Lit deba rubat rusur sapih ia

Sura-surana lalap ib’linkenna

Kata Dibata ndauh nge kap rassa

3) Reff :

Lit denga ka nge deba kalak jore

Ibas geluhna labo jumpa dame

Perukurenna rusur monce-once

Ban kekelengen labo ‘nggo ipake

4) Reff :

‘Di jelma gutul la terbeligai

Si nebu-nebu e pe kap merari

Kalak erjentik la erngadi-ngadi

‘Tah perubaten lit nge teptep wari

5) Reff :

Anem pe mbelang si man peranin

Si mehulina minter muat bagin

Emaka ola sidalih-dalihen

Banci nge dungi adi sir as-rasken

6) Reff :

Tuhan Dibata keleng ‘tena k’rina

Maka dilona jadi rarasenNa

B’rita si m’riah kita pembarkenca

Tentu terpuji gelar ni Dibata

KEE NO. 258

“ ENGGO ME MENTAS KAP TUHAN SI MALE “

1) Enggo me mentas kap Tuhan si male

Sini ku puji Dibata nge jine

Dage kawalilah min kami tole

Gelah terkelin bas paksa erbebe

Reff :

Mentasi wari bas tahun si enda

Ola min sada pe lit sibanggerna

Adi oratilah rusur KataNa

Si eteh nge dungna si benar ‘tah dosa

2) ‘Nggo gia tadingken tahunna si male

Lit si meriah lit ka nge sin dele

Lit ka si jore buen denga si kote

‘Di kiniteken min ola seh mbole

Reff :

3) Tahun si male ‘nggo lewat bentasi

Tahun si mbaru sangana dalani

Je olanai min lit si nggasgasi

Ku si mehuli madin ni ayaki

Reff :

4) Labo kap dalih gia tahun ‘nggo sambar

Kinitekennta min tetap la mobar

‘Ban pemeraNa man banta nge simpar

Gelahna kit ape mere melumbar

Reff :

5) Bas tahun enda lah gia pejore

Kune lit denga dahinnta si murde

Sababna banci nge k’rina petembe

‘Di b’re Dibata lah gegeh min tole

Reff :

6) Si ni arapken bas tahun si mbaru

Min lalap nggeluh bas kami kataNdu

‘Lah banci robah perlangkah-perlagu

Bas si la payo ilebe-lebeNdu

Reff :

7) Ibas Tahunna si mbaru enda gelah

PerpulungenNdu reh tambah ergiah

Nehken kataNdu man kalak si nilah

Maka reh mbarnalah B’rita si m’riah

Reff :

KEE NO. 259

“ SALAM RAS MEJUAH-JUAH “

1) Salam ras m’juah-juah kam

Toto kami nemanisa

Sangap bas perdalinenNdu

Dibatalah sinaruh kenca

Reff :

Ingetlah min ‘di ertoto kam

Kami ijenda kerina

Tuhan Dibata nemani kita

Rasa lalap rasa lalap e

2) Ibas ingan si ndauh pe

Min tetap kinitekenndu

Ikutken Kata Tuhannta

Dibata tetap penggurunndu

Reff :

3) Nande bapa kekelengen

Nggeluh bas erpengarapen

Doni ingan perlajangen

Metenget kam man si jahat e

Reff :

4) Tuhan si mada geluhta

Ia si nepa doni enda

La lit kap persirangennta

Dibata me pejumpa kita

Reff :

KEE NO. 260

“ OH ANDIKO JILENA “

1) Oh andiko jilena, tinepa Dibata

Subuk pertibi enda, ras isina k’rina

Deleng si meratah kerangen

Perik-perik rende kabangen

Andiko jilena si banNa

Seh kel kap ulina

Reff :

Emaka tanggarlah min kita jelma

Ola melasang, ola meturdaksa

Lit tenah kata pedah ni Dibata

Jaga kelengi, k’rina tinepaNa

2) Ah andiko cedana, si tepaNa ndube

Penggaya iblis ‘rbanca, jelma rate-rate

Uruk si megersing meturban

Rudang ‘nggo merapak i mbalbal

Andiko mekelek cedana

Bekas tinepana

Reff :

3) Ah andiko kelsehen, ‘ban tinepa mbernge

‘Ban ketulahen maka, dungna jelma murde

‘Nggo megembur layo meserge

Rudang ‘nggo merapak I mbalmbal

Andiko kelsehen nge kepe,

Sinasana ndele

Reff :

4) Oh andiko mulihken, min jilena ndube

‘Lah doni enda k’rina, la erkune-kune

Lit tinepa ceda petembe

‘Tah pe rudang melus pejore

Andiko gayangna kepeken

‘Di tinepa ‘rdame

Reff :

5) Oh andiko riahna, doni si’nggo mbaru

Aloken Yesus Tuhan, Juruselamatta

‘Lah rubia njingkang La m’lence

Perturah senuan la lengke

Andiko riahna ras Tuhan

Pusuh pe la nggine

Reff :

KEE NO. 261

“ KUGA KIN NDIA SURA-SURA NI DIBATA “

1) Kuga kin ndia sura-sura ni Dibata

Nandangi kita manusia pertibi enda

Jaga kelengilah kerina tinepaNa

‘Lah ula kita mekelesa

Ibas ngerabi ciluki k’rangen tua

‘Nggo jadi jajat piah meseng sinasana

Cimber meseng ‘nggo ngulungi ‘nterem jelma

Turah penakitna mate k ape lit nge deba

2) Wari perlego pe kap terketes nge si turah

Senuan-senun pe terketes nge si turah

Lit pe si turah enggo kurang si erbuah

Je reh teremna kalak lapar ras si suhsah

3) Adina radas kin tabahi batang kayu

Erbanca uruk pe ras deleng bagi tabu

Piah enggo sapsap kin arusna tahan-turu

Reh kenca udan minter naring’ ng’raja lau

4) Ibas nggasgasi ‘di la kenca kita robah

Tambah teremna rusur kalak erban ulah

Lau si maler pe kap dungna pagi kerah

Si gelgel malem genduari jadi ngisah

5) ‘Tah ‘ban alerken rusur lau si la payo

Enggo megembur si nai nari kin meciho

Ngidah binurung pe ateta ‘nggo megogo

‘je kalak ridi pe lanai bo pang ku layo

6) Perik si kabang pe ‘nggo urak beliganna

Rubia-rubia pe lit masap sinursurna

Nurung ‘bas layo pe ‘nggo bilangenna

‘Di gasgasi tentu napnap nge jadina

KEE NO. 262

“ DONI ENDA SEH ULINA “

1) Doni enda seh ulina

Tuhan si nepasa

Ras isina pe k’rina

B’rekenNa banta

Reff :

Sehken bujur dage baNa

Arah k’rina dampar g’luhta

Sehken bujur dage baNa

Arah k’rina dampar g’luhta

2) Taneh si mekapal enda

Tuhan si nembasa

Kai pe mbue kap bassa

Kuh banNa banta

Reff :

3) Rumah enda seh jilena

Tuhan si m’rekenca

Datken pasu-pasuNa

Kam ngianisa

Reff :

4) Kiniliten enda k’rina

Tuhan kap empuna

Si pakeken min k’rina

Guna k’rajanNa

Reff :

5) Gelah lit tetap rumatta

Tuhan njaminisa

Kinis’ran pe ngampangsa

Piher ukurta

Reff :

KEE NO. 263

“ ADI KUIDAH AMPAR BINTANG TERANG “

1) Adi kuidah ampar bintang terang

Ras sora lenggur kubegi

O, Tuhanku ije ukurku mamang

Ngidah b’linna krina tinepaNdu

Reff :

Maka pusuhku e pehaga Kam

Mbelin me Kam o, Tuhanku

maka pusuhku e pehaga Kam

O, Tuhanku, mehaga kam

2) O, Tuhanku di k’rina kuukurken

Perkuah ‘teNdu nebusi aku

Tuhan me kap man bangku nggo ib’reken

Alu dareh Yesus si badia

Reff :

3) Di sada paksa Kristus ndilo aku

Keriahenku tuhu mbelin je

Perban nggo seh kai jadi kesikelku

Ngidah sinalsal terang ayoNdu

Reff :

KEE NO. 264

“ ATEKU TEDEH “

1) Ateku tedehman baNdu o Tuhan

Malem me ateku jumpa si erkuasa

Aku megegeh di ras Kam o, Tuhanku

Sabab Kam me kapen, ulu sinasana

Reff :

Kubegi kataNdu kata tuhu-tuhu

Keke me ukurku nehken peratenNdu

2) Terang kataNdu, nerangi pusuhku

Pusuh jadi senang, ergiah geluhku

Gegeh si mbaru, berekeNdu bangku

Labo aku talu, meriah ukurku

Reff :

3) Ib’reNdu pedah, kuakap pe megah

Tambah perngertian, dat kiniulien

Tambah pemeteh, turah kapen gegeh

pemereNdu sampur, ras kusehken bujur

Reff :

KEE NO. 265

“ DESKEN LAMPU SI MEDIK-EDIK “

1) Desken lamu si medik-medik

Idas perahu kitik-kitik

Bagem perdalinen geluhta

I tengah g’lombang doni enda

Reff :

Enggo kap ndube Kam erpadan

Lampu si medik la nimpetken

Buluh si mbeltuk pe jineken

Labo kap sada pe penggelken

2) Kecibalen doni si gelap

Terang si kitik pe terakap

Amin pe milep-ilep ngenca

Enterem jelma merlukenca

Reff :

3) Dage cidahken min o, Bapa

Man k’rina isi doni enda

Maka itehna min gereja

Em Jesus Kristus so madasa

Reff :

4) Pasu-pasuNdulah min krina

Pergeluh ngawan perpulungen

Ras serayanNdu japa gia

Bas Jesus la lit erndobahen

Reff :

KEE NO. 266

“ ERSEMBAH KAMI BANDU “

1) Ersembah kami baNdu

Kerna lias ateNdu

Bas perkuah ateNdu

Tembe rumah mbaru

Meriah tuhu-tuhu

Nggejapken pasu-pasu

Bujur ning kami baNdu

Terpujilah gelarNdu ….. 2 x

2) Malem ateta k’rina

Wari si sendah enda

Totonta begikenNa

Seh sura-suranta

Sora Dibata jenda

Terbegilah tetap

‘Di geluhta badia

Terpujilah gelarNa ….. 2 x

3) Gegehi kami tetap

Ndalanken peratenNdu

KelengNdu la ‘mb’ra masap

Seh ku anak kempu

Gegehku ras ertangku

Kusembahken man baNdu

Tetapkenlah jingkangku

Seh ku bas RumahNdu ….. 2 x

KEE NO. 267

“ ENGGO TANGKAS PASU-PASU TUHAN “

1) Enggo tangkas pasu-pasu Tuhan

Dua ngawan si nggo sada arihna

Erpadan njabuken bana i lebe Dibata

Meriah kal si akap kerina

Reff :

Pasu-pasu o, Dibata jabu simbaru e

Sepengodak sepengelo ibas jabuna

2) KataNdu me kap gelemen kami

K’leng ateNdu kap si tetap nemani

Pedah Tuhan ipake pe tetap dame

M’riah nggeluh ras malem ate

Reff :

3) Sampat ia ndalanken pedahNdu

Ersada bas ukur malang man baNdu

Ndahiken si erguna g’luhna tetap badia

Terpujilah gelar ni Dibata

Reff :

KEE NO. 268

“ ENGGO NDEHER ME KEDUNGEN ZAMAN “

1) Enggo ndeher me kedungen zaman

Reh t’remanna si la malang Tuhan

Kekelengen enggo reh bergehna

Kalak jahat lalap reh tambahna

2) La bo lit senangna i bas perang

Lit kap talu gia lit si menang

Cedana mesangat murde k’rina

Gulut kap ukur la lit jorena

3) Keke ka kepeken nabi palsu

Tempana kuasa Tuhan ras ia

Babaina seh kalak kena tipu

Si ngikutken ia benekenna

4) Lit kape turah mara kelesa

Ngamuk ka linur reh nega-nega

Pangan pe muatsa seh serana

Em tanda kedungen zaman enda

5) Enterem pagi lit kalak murtat

Nadingken Tuhan Juru Selamat

Ndalanken jahat akapna megah

Pergeluh pe lanai bo erpepah

6) Sikaplah kita dingen erjaga

Labo kap sieteh ndigan paksana

Tuhan e rempet reh ndahi kita

Tetaplah patuh dingen setia

KEE NO. 269

“ ENGGO MASAP DOSANGKU “

1) Enggo masap dosangku

Krina perban dareh Yesus

Malem ate tendingku

Krina perban dareh Yesus

Reff :

O, dareh Tuhanku

Si ngklini tendingku

Badia geluhku

K’rina perban dareh Yesus

2) Dame me kap pusuhku

K’rina perban dareh Yesus

Labo perban bujurku

K’rina perban dareh Yesus

Reff :

3) Pengarapenku nteguh

K’rina perban dareh Yesus

Sangap geluhku tuhu

K’rina perban dareh Yesus

KEE NO. 270

“ ERMENGKAH RAS ERTOTO “

1) Ermengkah ras ertoto, em keg’luhen si payo

Bas Kristus k’riahentam meteruk ukurta

Reff :

Ibas senang ntah susah kecibal geluhta

Pujilah Tuhan, kataken bujur alu bulat ukur

2) Meder udan ras baho, petir gelap ras lenggur

Tumpat ukurku labo, kukataken bujur

Reff :

3) Kai kin erti geluhta, ‘di la muji Dibata

Kita enggo itebus, alu dareh Kristus

Reff :

KEE NO. 271

“ I DONI ENDA MBUE KESUSAHEN “

1) I doni enda mbue kesusahen

Bage pelit ka nge perubaten

Reh la min KinirajanNdu

I gereja si arus ersada

Maka tangkas ke’geluhen si mbaru

Reh lah min KinirajanNdu

2) Gelah talu gelap kemusilen

Cidahkenlah terang keadilen

Reh lah min KinirajanNdu

I bas lawit I deleng I juma

I dalan , i tiga, ras i kota

Rehlah min kinirajaNdu

3) Bas pusuhku, kata ras perbahanen

Kekelengen rasp e kebenaren

Reh la min KinirajanNdu

Kam me kapen si mada si nasa

I bas Kristus bangsaNdu ersembah

Rehlah min kinirajanNdu

KEE NO. 272

 “ ISE KIN KAMI ENDA O, BAPA “

1) Ise kin kami enda o, Bapa

Maka kami ngasup mere baNdu

Labo ban gegeh kami o, Bapa

Lako mere man baNdu

Reff :

Kai pe si lit ibas kami o, Bapa

E kap bekas pemereNdu man kami

Enda sada bagin Bapa

Ipersembahken kami

2) Ngataken bujur kami man baNdu

Arah persembahen kami enda

Aloken ras ipasu-pasuNdu

Terpujilah gelarNdu

Reff :

3) Nggejap b’linna perkuah ateNdu

Makana kami mere man baNdu

Kai pe cukup ibas Kam o, Bapa

Kam Raja Surga doni

Reff :

KEE NO. 273

“INGETLAH MIN GELAR YESUS “

1) Ingetlah min gelar Yesus

Susah ntah senang gia

Ia me kap penampatndu

Kuja pe perlawesndu

Reff :

Mehaga gelarna

Pengarapenta k’rina

Mehaga gelarna

Ermulia gelarNa

2) Pake tetap min pedahNa

E me kap senjatanta

Kune reh percuban nderpa

Tentu la kita mampa

Reff :

3) Bage me kelengNdu bangku

Kam ingeten pusuhku

E maka tetap ukurku

Permuliaken gelarNdu

Reff :

KEE NO. 274

“ KUPUJI KAM O, TUHAN “

1) Kupuji kam o, Tuhanku perban kesetianNdu

Ateku nggeluh badia, Ngelawan kuasa doni

Bage me sura-surangku, Bere gegeh ras kuasa

Gelap tetap perjingkangku

2) Kam saja patut dat pujin, bas kegeluhen kami

Ban Kam Tuhan si perkeleng, si nasap dosa kami

Siberitaken me dage perbahanenNa si mbelin

‘Lah doni pe muji Tuhan

3) Madin ernalem man Tuhan asang man doni enda

La lit si tetap kai pe lang, bas Tuhan Jesus ngenca

Reh kami ngadap man baNdu, aloken kami o, Tuhan

Kami si nggo itebusiNdu

KEE NO. 275

“ KAM TUHAN SEKAWALKU “

1) Kam Tuhan sekawalku, La lit kebiarenku

Amin gulut ukurku, Ernalem tetap baNdu

Galumbang si merawa, Jadi ibas geluhku

Lalap aku erpengendes, Sebab Kam kap bentengku

2) Aku iapuliNa, adi reh kesusahen

ibrekenNa bangku perpadan si tetap

“Ola mbiar anakKu, Aku kap sekawalNdu”

Bage kap nina Tuhanta, man banta si tek baNa

3) ‘Di bage nina Tuhan, ula pedekah-dekah

Sidahilah gundari, Tuhanta si perkeleng

Ikutkenlah kataNa, ula pekulah-kulah

Pengarapen ib’rekenNa, em gegeh bas geluhta

KEE NO. 276

“ KUIKUTKEN KAM O, TUHAN “

1) Kuikutken Kam o, Tuhan

Kam kap si perkeleng e

Sabab Kam si mere dalan

Dalan terkelin kepe

Reff :

Ia kapen Juru Slamat

Ia kapen penampat

KataNa me kapen tambar

KuasaNa la ‘rsibar

2) Tuhan kapen kuarapken

Jadi temanku nggeluh

Tetap Ia penaleman

Kinitekenku nteguh

Reff :

3) Aku jadi si permenang

Yesus kap menangkenca

Pusuhku dame ras senang

Tuhan kap si m’rekenca

Reff :

4) Kudarami K’rajan Tuhan

Ras pe kebenarenNa

Ib’reNa si ni perluken

Tanda keleng ateNa

Reff :

KEE NO. 277

“ KAM SI ‘RJABU SENDAH ENDA “

1) Kam si ‘rjabu sendah enda

PetetapNdulah ukurndu

Gelem padan ras janjindu

Janji si nggo belaskenndu

Ula lupa pedah ras kataNa

Sabab e kap gegeh ras senjata

Ibas ngalaken kerina paksa

Gelah dame tetap keg’luhendu

2) Bujur ninta man Dibata

I bas k’rina pemereNa

Ia si njayam geluhndu

Gelah tetap perjingkangndu

Dage ersadalah min arihndu

Sada ukur sada penggejapen

E maka tetaplah i bas Tuhan

Si mere pasu-pasu man baNdu

3) Kerina lit kap paksana

Nggeluh ibas doni enda

Lit paksana ndele ate

Lit ka paksana meriah

Tapi bagi nina Tuhan Yesus

K’rina maba ku bas kesangapen

Adi kita ernalem man baNa

Dage kataken bujur baNa

KEE NO. 278

“ KUDAHI RUMAH PERSEMBAHEN “

1) Kudahi rumah persembahen

Segelah aku jumpa Tuhan

Ban ia sumbul keriahen

Nggo b’reNa bangku kesanggupan

Reff :

Ersada me anakNdu k’rina

Bas kiniteken tetap paguh

Bagem biak anak Dibata

Tetap nembah ras muji gelarNdu

2) I adep-adepken Dibata

Si akukenlah k’rina dosa

Je robah kita dingen jera

Sigejap me pengalemiNa

Reff :

3) Begikenlah kata Dibata

Em kap si nerangi geluhta

Jadikenlah wari-warinta

Penembahenta e man baNa

Reff :

4) Mehuli me akap Dibata

Si mesikel pulung i jenda

Tetap metedeh la ateta

Pulung meriah bas rumahNa

Reff :

KEE NO.279

 “ KAM KAP DIBATANGKU “

1) Kam kap dibatangku

Kam inganku cicio

Tegu-tegu aku

Begiken pertotonku

Reff :

Ernalem man baNdu

Kam pengarapenku

Kidekah geluhku

Kupuji Kam Tuhan

2) Bere gegeh bangku

Mekuah ateNdu min

Labuh kal tendingku

sampatiNdu aku min

Reff :

3) Entah kai si jadi

Tetapkenlah ukurta

Ras pe megenggenglah

Ndalani kiniseran

Reff :

4) Kupuji Kam Tuhan

Rende aku man baNdu

Sabab seh ulihna

perbahanenNdu bangku

Reff :

KEE NO.280

“ KEG’LUHEN DONI TUHAN SI NGATURKENCA “

1) Keg’luhen doni Tuhan singaturkensa

Labo tersipati , Ia simada kuasa

Tah kai pe jadi, Leben enggo itehNa

La lit si terbuni, I lebe-lebeNa

La lit si terbuni, I lebe-lebeNa

2) Man Tuhan pindo k’rina si perlukenndu

Sehken arah toto, la bo perlu kam aru

Lah tetap ukur arapen la erkusur

Kekelengen Tuhan tetap labo luntur

Kekelengen Tuhan tetap labo luntur

3) Bas sada paksa i bas kegeluhenta

Tah gulut ukurta ras mambut pe iluhta

Ola min lupa nandangi lias ateNa

GegehiNa kita ban keleng ateNa

gegehiNa kita ban keleng ateNa

KEE NO.281

“ KEK’LENGEN YESUS KEMPAK MANUSIA “

1) Kek’lengen Yesus kempak manusia

Desken Dibata engkelengi ia

KekelengenNa maler kap man banta

Adi sipakelah pedahNa

Reff :

Min sikeleng-kelengen kita k’rina

Bagi pedahken Yesus bas pustaka

Sababna kai si pindo bas gelarNa

Ib’re Dibata man banta

2) Ngasamken kesah nggit me kepe Ia

Gelah terkelin kita manusia

Dage dalanken si ni pedahkenNa

Kempak temanta ise gia

Reff :

3) Bas paksa kita nehken kekelengen

Ola min siban ceda kempak teman

Erban mehuli ola rahan-rahan

Lah kedamen jujurken Tuhan

Reff :

KEE NO. 282

 “ KUKATAKEN BUJUR BANDU “

1) Kukataken bujur bandu

O Kam Tuhan Penebus

Aku enggo s’lamatkenNdu

Arah lias ateNdu

Reff :

Keleng kal ateNdu

Simpar kap ngaruhNdu bangku

Lias ateNdu lanai iterpilasi

Kupuji Kam tep-tep wari

2) Tergejap pasu-pasuNa

I bas kegelehenku

Rejeki arah dalinku

Icur-curkenNdu bangku

Reff :

3) Arah perkuah ateNdu

Mejuah-juah aku

Senang me kapen geluhku

Kupujilah gelarNdu

Reff :

KEE NO. 283

“ KATA NI DIBATA BAGI CIRUS UDAN “

1) Kata ni Dibata bagi cirus udan

Nusur ku doni enda peturah sinuan

O, la ngit ras doni kam pe o, pertibi

Begiken soraNa, jadi erpemegi

2) Aloken tendingku kata ni Dibata

Ia kap setia, adil perbahanNa

Benar me kap Ia, padanNa pe tetap

Si ngikutken Ia, dame rasa lalap

3) Nggeluh i bas doni lalap lit si kurang

Di nadingken Tuhan, geluh kin pe rontang

Ibas Tuhan ngenca, ulu pengarapen

Si ernalem ba-Na, ndatken kesangapen

KEE NO. 284 “ KAMI SI REH NDAHI BAPA “

1) Kam sir eh ndahi Bapa

Maba baban si mberat kap

Picet rukur gulut nderpa

penampatNdu ‘rban terakap

2) O, Tuhan Jesus sampatlah

Si sakit ntah raste ndele

PerkuahNdu ‘rbanca pulah

Ukur kami pe lana bene

3) Di kinitekenku kote

Pengarapen menam bene

Kuasa ras keleng ateNdu

E saja penalemenKu

KEE NO. 285

“ KAM ME O, TUHAN PEMATANG G’LUHKU “

1) Kam me o, Tuhan pematang g’luhku

Kam empuna tendingku

Tedeh ateku si kel ukurku

Rembak tetap min ras Kam

Reff :

RembakkenNdu aku o, Tuhan

Ku kayu persilangNdu

RembakkenNdu aku

RembakkenNdu lah Ku lebeNdu o, Tuhan

2) Pegegehilah badiakenlah

Aku enda kawanNdu

G’lah paguh aku, tetap ukurku

Bas nehken peratenNdu

Reff :

3) Seh kel senangna seh kel riahna

Rembak ras kam o, Bapa

Sanga ertoto ersembah

Ukur pusuh ermegah

Reff :

4) La bo ‘nggo serta g’luh doni enda

Ras Kam ngenca mambarna

I bas rumahNdu i adepenNdu

Dame me tuhu-tuhu

KEE NO. 286

“KUIKUTKEN ME DALANNDU “

1) Kuikutken me dalanNdu

Dalan dame man bangku

Terkelin me kap geluhku

Itebusi darehNdu

Reff :

Kuikutken me dalanNdu

Kuendesken geluhku

Bas Kam o Juru S’lamat

Dame senang tendingku

2) Mesera gia dalanku

PadanNdu kap enteguh

Ngelawan kuasa gelap

Di ras Kam menang tuhu

Reff :

3) Kupersilahangken bangku

Ngikutken pendiloNdu

Kudalanken peratenNdu

Dat aku pasu-pasu

Reff :

4) Kupetetap me ukurku

Nggeluh bujur ras tuhu

B’reNdu usihen man bangku

Puji sembahku baNdu

Reff :

KEE NO. 287

“ KUNE BAS GELUHTA MARA REH NDERPA “

1) Kune bas geluhta mara reh nderpa

Arus jaga ula ukurta pera

Pasu-pasu Tuhan ula kal lupa

KekelengenNa la kap nggo erleka

Reff :

Pasu-pasuna si ingetlah

Ia kapen ulu ni tuah

Pasu-pasu Tuhan ingetlah

Tuhan si perkuah tetap sembahlah

2) Kune baban mberat ‘rbanca kam kote

Ntah pengajuk doni ‘rbanca kam mbole

Di kecibal geluh bagi la jore

Tapi kiniteken ola kal monce

Reff :

3) Kune erta doni ngajuk erdilo

Biak si mehuli pe jadi menggo

Perukuren mobah lanai meciho

Tadingken kerina biak la payo

Reff :

KEE NO. 288

“ KU’ENDESKEN K’RINA GELUHKU “

1) Ku’endesken k’rina geluhku, anem melket aku

Tuhan penalemenku, Tetap me ukurku

Ku simbak p’raten doni, Lah me tunggung aku

Gegeh kuasaNdu, ndemi lah malem ateku

2) Bas paksa kesusahen pusuhku la gentar

Kam me kap penalemen, Ia kal aku mbiar

Mbelin keleng ateNdu si njayam geluhku

Senang kel kap ras Tuhan, ersurak tendingku

3) TemaniNdu kap aku bas dalin geluhku

CikepNdu tetap tanku, k’leng ateNdu tuhu

Alu kuasa KesahNdu.pengasupNdu aku

E maka la aku lupa, peb’linken gelar’Ndu

KEE NO. 289

“ LALAP SIKATAKEN BUJUR “

1) Lalap sikataken bujur

Beritaken kemulianNa

Mbelin pemeraNa banta

Puji gelarNa

Reff :

Dibata kap ciling gementa malem ateta

Tuhan Dibata Penalementa

Penanam-nanam bas geluhta

2) K’leng ateNa kapen nusur

Lalaplah ngataken bujur

Ingetlah pedahNa rusur

Segedang umur

Reff :

3) Adi seh sura-suranta

Labo e perban gegehta

Maka ula kita lupa

La m’rekenca

Reff :

KEE NO. 290

“ LABO ERKITEKEN BELUHKU “

1) Labo erkiteken beluhku

Labo erkiteken pentarku

Tapi perbahan penampatNdu

Mbelin tergejap bas ngasupku

2) Labo erkiteken dahinku

Labo erkiteken pangkatku

Tapi perbahan perkuahNdu

Malem ateku tuhu-tuhu

3) Labo erkiteken ertangku

Labo erkiteken bayakku

Tapi perbahan pemereNdu

Pasu-pasuNdu simpar bangku

KEE NO. 291

“ M’RIAHKAL UKUR KAMI O, BAPA “

1) M’riahkal ukur kami o, Bapa

Nembah jimpuh ertoto baNdu

Kam o, Tuhan i puji kami

Ermulia gelarNdu

Bengket kami o, Tuhan

Ngadap ku lebeNdu

Reh kami muji-muji gelarNdu

Tuhan si Badia

2) Ulih peranin kami

AlokenNdu, Bapa

E me pengataken bujur kami

Man Bandu Dibata

3) Bujur ningkami baNdu

Ban keleng ateNdu

icukupiNdu k’rina si perlu

mbelin kal kuasaNdu

KEE NO. 292

“MANUSIA ENGGO ERDOSA “

1) Manusia enggo erdosa

Meluat mekelsa

Pusuh labo lit damena

Di sirang ras Dibata

Begikenlah pendiloNa

Ikutken kataNa

Geluh pelimbaruiNa

Rembak kita ras Ia

2) Megati meganjang ukur

Nogan nimbak kataNa

Piah dungna latih rukur

Di sirang ras Dibata

Begikenlah pendiloNa

Malang erlajar baNa

Di mberat pe bas geluhta

Menahang di ras Ia

3) Di kita la mediate

Man teman ras jabunta

I ja pe la malem ate

Disirang ras Dibata

Begikenlah pendiloNa

Sampati turang senina

Dame senang ukurta

KEE NO. 293

“ MERIAH UKUR KAMI O TUHAN “

1) Meriah ukur kami o Tuhan

Lias ateNdu si enggo tersuan

Igejap kami kuasaNdu mbelin

Si erban kami k’rina terkelin

Kam me kap si pegedangken umur

Man baNdu kami ngataken bujur

Kam kapen si pegedangken umur

Man baNdu kami ngataken bujur

2) Penalemen kami suari berngi

Kam ukurna k’rina si mehuli

M’riah ukurNdu tetap njujuri

Lalap icur-curkenNdu rejeki

Adina reh si serbut ngguluti

PenampatNdu kap minter nurihi

Adina reh si serbut ngguluti

PenampatNdu kap minter nurihi

3) ItampekenNdu umur si gedang

Rikut k a pe ras ukur si senang

Bas dalin gelap ib’reNdu terang

Keleng ateNdu la kap nggo sirang

KuasaNdu la kal kapen teralang

Keleng ateNdu la kap nggo sirang

KuasaNdu la kal kapen teralang

4) Kasakai gia lit iba geluh

M’lala ka gia musuh reh ngupuh

Aminna doni g’rupuh tah gujuh

La aku ndabuh la aku labuh

Pengarapenku enteguh paguh

Tetap ‘ku patuh tanNdu kap ngasuh

Pengarapenku enteguh paguh

Tetap ‘ku patuh tanNdu kap ngasuh

KEE NO. 294

“ MERIAHKAL UKURTA “

1) Meriahkal ukurta, reh kam penampat

Pesikaplah dalinNa ibas ukurta

Biak-biak keg’lapen tadingken k’rina

Aloken kesangapen keleng ateNa

Reff :

Si alo-alo ia ralep aleplah min kita

Pesikaplah inganNa bas ukurta

2) Di lit si meluk-eluk si pesikaplah

Ukur si nggeduk-nggeduk jadi pinterlah

Pesai-pesai dalanNa Raja Mulia

Babailah kalak k’rina nembah man baNa

Reff :

3) Dibata kap Bapanta si nuruh Ia

Nusur ku doni enda dahi manusia

Robahlah dingen jera kita kerina

Dosanta iangkutNa terkelin kita

Reff :

KEE NO. 295

“ MERIAHKAL UKURKU M’RITAKEN GELARNA “

1) Meriahkal ukurku m’ritaken gelarNa

Berita kerna Yesus ras keleng ateNa

Meriahkal ukurku nuriken si benar

Peturah kiniteken ukurku tergintar

Reff :

Pembarkenlah kataNa, Kempak kerina jelma

Kerna YesusTuhanta ras keleng ateNa

2) Meriahkal ukurku m’ritaken gelarNa

Ergan kuasa gelarNa asang doni enda

Meriahkal ukurku nuriken man bandu

Enda b’rita si mbelin si’rbanca terkelin

Reff :

3) Meriahkal ukurku m’ritaken gelarNa

Bas tetap kuulihi ertambah malemNa

Meriahkal ukurku mbelin kuasaNa

‘Lah si langa metehsa ikut ngalokenca

Reff :

KEE NO. 296

“MAN BANDU YESUS TUHANKU “

1) Man baNdu Yesus Tuhanku

Kuendesken geluhku

Nggeluh sikeleng-kelengen

Nggit si sampat-sampaten

Reff :

Erbuah kata ni suan

Bas kita anak Tuhan

Erbuah kata ni suan

Bas kita anak Tuhan

2) Nggeluh sitatang-tatangen

Kita radu megegeh

Nggit kita ngalemi salah

Pusuh dame meriah

Reff :

3) Mediate ras mesayang

Si m’uli ula sungsang

Tetap siajar-ajaren

La sitogan-toganen

Reff :

4) Kuene teman mambur iluh

Sampat g’lah ula ndabuh

Paksa keriahen ukur

Minter kataken bujur

Reff :

KEE NO. 297

“ MAN BANDU RAJA G’REJA “

1) Man baNdu Raja Greja, Isehken kami bujur

Kam kap si njayamsa, Geluh perpulungenNdu

Pasu-pasuNdu Tuhan, Kusemin bagi udan

Maka serayanNdu, I demi kuasaNdu

Latih ia la mbiar, Ukurna tetap nggintar

Kek’lengenNdu simpar BritaNdu jadi mbincar

2) Bahanlah min o, Tuhan erdolat serayanNdu

Ngayu ras tersuan ngaloken pendiloNdu

Ukur, pengarapenna man baNdu saja ngenca

Tutus ras setia, kataNdu la tersia

Lagu-langkah mulia, e Kam si pesikapsa

Tutus kal ateNa mbarken kata Dibata

KEE NO. 298

“ MBINCAR MATAWARI “

1) Mbincar matawari

Enggo kap nerangi

Krina negeri

Juma ntah pe Sabah

Krangen si meratah

Mehuli t’ridah

2) Terang ersinalsal

Kerina merandal

Tangkas kuidah

Bapa si ni Surga

Bapa si erkuasa

La kusembah

3) Wari-wari g’luhku

E pe pemereNdu

ijujurkenNdu

ermengkah ateku

bekas penjayamNdu

pujin man baNdu

KEE NO. 299

“ NGIKUT TUHAN KIN ATENDU “

1) Ngikutken Tuhan kin atendu, persan silang

Ola sangsi ola mbiar ikutkenlah

Persan saja min silangNdu, Ikut terus

Mulia me kal upahNdu tetap tutus

2) Simbaklah min peratenndu, sabar tetap

Bujur saja ukurindu, dat me sangap

Persan saja min silangNdu, Ikut terus

Mulia me kal upahNdu tetap tutus

3) Kune susah tah mesera, megeng-genglah

Tuhan Yesus ushienta, ikut gelah

Persan saja min silangNdu, Ikut terus

Mulia me kal upahNdu tetap tutus

KEE NO. 300

“ NEHENLAH SEKELEWETTA “

1) Nehenlah sekelewetta

Tataplah ku juma-juma

K’rina page nggo reh gersingna

Paksa rani enggo ertima

Reff :

Nehenlah sekelewatta

Tataplah ku juma-juma

Nggo gersing page kerina

Paksa rani enggo ertima

2) Juma e kai antusenNa

Page e kai ka ertina

Juma e me kap doni enda

Page e me jelma kerina

Nehenlah sekelewatta

Tataplah ku juma-juma

Nggo gersing page kerina

Paksa rani enggo ertima

3) Juma e ise madasa

Page e ise empuna

K’rajang Tuhanta enda kerina

Doni enda ia empuna

Nehenlah sekelewatta

Tataplah ku juma-juma

Nggo gersing page kerina

Paksa rani enggo ertima

4) Di bage ise p’ranisa

Juma e bage belangna

Pindolah man si mada juma

Nuruh k’rina si erdahinNa

Nehenlah sekelewatta

Tataplah ku juma-juma

Nggo gersing page kerina

Paksa rani enggo ertima